Զալցբուրգի կրթական ծրագիրը շարունակվում է

«Դիագնոստիկա»ԲՄ ճառագայթային ախտորոշման բաժնի վարիչ,բժիշկ-ճառագայթաբան Հարություն Մուրադյանի հարցազրույցը

Զալցբուրգի կրթական ծրագրի հայաստանյան համակարգող Բելլա Գրիգորյանի հետ

Ո՞ր թվականից սկսեց գործել Զալցբուրգի բժշկական կրթական ծրագիրը: 

- Զալցբուրգի բժշկական կրթական ծրագիրը Հայաստանում գործում է 1996թ.-ից: Սկզբում կոորդինատորը Բաց հասարակության ինստիտուտի օժանդակության հիմնադրամի (SOROS) հայաստանյան գրասենյակն էր: 2003 թվականից այն վարում է մեր կազմակերպությունը` Հայ օգնության ֆոնդի (ՀՕՖ) բժշկական շրջանավարտների միությունը, որի համակարգողն եմ մինչև օրս:

Ի՞նչ է ներկայացնում իրենից այս ծրագիրը, ո՞րն է դրա նպատակը: 

- Ծրագիրը շարունակական բնույթ ունի: Այն սկսվում է Զալցբուրգում կազմակերպվող 7-օրյա սեմինարներից, որը հետագայում հնարավորություն է տալիս 3 անգամ մեկական ամսով վերապատրաստվել Ավստրիայի լավագույն հիվանդանոցներում և համատեղ աշխատել տեղացի բժիշկների հետ:

Սեմինարներում դասախոսում են ԱՄՆ-ի լավագույն բժշկական կենտրոնների մասնագետները: Դա հնարավորություն է տալիս շփվել նրանց հետ, քննարկել բարդ դեպքերի հետ կապված տարբեր հարցեր, ինչպես նաև կապեր հաստատել հետագայում երկարատև համագործակցության համար: 

Մենք ունենք սեմինարներին մասնակցած 600-ից ավելի մասնագետներ, 200-ից ավելի ինտերններ, որոնք մեկական ամսով վերապատրաստվել են Ավստրիայի լավագույն հիվանդանոցներում: Հայաստանի պես փոքր երկրի համար դա լավ ցուցանիշ է: 

Սեմինարների թեմաները սկզբում զուտ կլինիկական էին: Դրանք ընդգրկում էին մանկաբուժական, վիրաբուժական, թերապևտիկ մասնագիտությունների հետ կապված 30-ից ավելի տարբեր դասընթացներ: 2013թ.-ից դրանք կհամալրվեն «Շարունակական բժշկական կրթություն» և «Բժշկական սպասարկման որակի գնահատում» նոր սեմինարներով: Այսպիսով, ծրագիրն ընդարձակվում է, այս տարի ընդգրկվել են նաև բուժքույրերը: Բուժքույրական սեմինարները նվիրված են լինելու ծանր հիվանդների պալիատիվ խնամքին: Բուժքույրերի համար դասախոսությունները կթարգմանվեն ռուսերեն: Պետք է նշեմ, որ բժիշկների սեմինարների մասնակիցների համար անգլերեն լեզվի իմացությունը պարտադիր է: Մենք դա նախապես ստուգում ենք ԱՄՆ-ից կամ Անգլիայից հրավիրված լեզվի մասնագետի օգնությամբ:

Բացի զալցբուրգյան սեմինարներից, կազմակերպում ենք սատելիտային սիմպոզիումներ, երբ դասախոսները ԱՄՆ-ից և Եվրոպայից գալիս են Հայաստան և այստեղ դասախոսություններ կարդում նեղ մասնագիտական թեմաներով: Այդպիսիք են քիթ-կոկորդ-ականջաբանությանը, մանկական արյունաբանությանն ու ուռուցքաբանությանը նվիրված սիմպոզիումները: Այս տարի, օրինակ, մայիս-հունիս ամիսներին տեղի ունեցավ քիթ-կոկորդ-ականջաբանություն մասնագիտությամբ սատելիտային սիմպոզիումը, որը կազմակերպել է ԵՊԲՀ քիթ-կոկորդ-ականջաբանության ամբիոնը` նույնանուն բժշկական ասոցիացիայի հետ համատեղ: Այն ղեկավարում էր պրոֆեսոր Արթուր Շուքուրյանը: Մանկական արյունաբանությանն ու ուռուցքաբանությանը նվիրված սիմպոզիումը կազմակերպվել էր ՙՄուրացան՚ համալսարանական հիվանդանոցի քիմիոթերապիայի բաժնում, որը ղեկավարում էր պրոֆեսոր Սամվել Դանիելյանը: Մասնակիցները Երևանից և մարզերից հրավիրված բժիշկներ էին, իսկ դասախոսությունները կարդում էին Ավստրիայից ժամանած մասնագետները: Տեղացի բժիշկները ներկայացրեցին բարդ կլինիկական դեպքեր, ՙՄուրացան՚ համալսարանական հիվանդանոցում ավստրիացի բժիշկների կողմից զննվեցին 10-ից ավելի հիվանդներ, մի շարք դեպքերում ճշտվեցին ախտորոշումները և բուժման տակտիկան, ինչը շատ կարևոր էր ինչպես բուժող բժիշկների, այնպես էլ հիվանդների համար: 

Այս տարիների ընթացքում մենք Հայաստանում կազմակերպել ենք սատելիտային 7 սիմպոզիում սրտաբանության, վնասվածքաբանության, մոր և մանկան առողջության պահպանման և այլ թեմաներով: 

Ինչպիսի՞ այլ միջոցառումներ են կազմակերպվում Հայաստանում այս ծրագրի շրջանակներում:

- Ինչպես նշեցի, մենք ունենք Զալցբուրգի սեմինարների 600-ից ավելի մասնակիցներ և շատ կարևոր է ձեռք բերած գիտելիքների փոխանցումը գործընկերներին տեղում: Նշենք, որ Զալցբուրգի կարգախոսն է «Կոլեգան օգնում է կոլեգային»: Մեր մասնակիցների մեծ մասը մասնակցում է ՀՕՖ-ի մարզային բժիշկների վերապատրաստման ծրագրերին` արդեն որպես դասախոսներ: Մարզերից եկած մասնագետները մեկ ամիս դասընթացներ են անցնում Զալցբուրգում վերապատրաստված բժիշկների մոտ, միասին հետազոտում են հիվանդներին, քննարկում բարդ դեպքեր, մարզային բժիշկը որևէ հարց ունենալու դեպքում միշտ կարող է զանգահարել և խորհրդակցել իր կոլեգայի հետ:

Հետադարձ կապը պահպանելու հարցում մեզ համար շատ կարևոր է networking-ի (գործնական կապերի ստեղծում) գաղափարը` ինչպես Զալցբուրգի ամերիկյան դասախոսները կապ են պահպանում սեմինարների մասնակիցների հետ, այնպես էլ մեր մենտորները կապ են պահպանում մարզային բժիշկների հետ` օգնելով մարզի մասնագետներին որակով աշխատանք կատարել և բարձրացնել իրենց մասնագիտական հմտությունների մակարդակը:

Ի՞նչ կարող եք ավելացնել ասվածին:

- Ուզում եմ տեղեկացնել, որ 2013թ. սեմինարներին մասնակցելու դիմում հայտերն արդեն ընդունվում են մեր էլեկտրոնային կայքի միջոցով. www.platform.aaf-online.org:

Ավելորդ չենք համարում հիշեցնել, որ սեմինարներն ընթանում էին «Շլոս Արենբերգ» անունը կրող նորոգված միջնադարյան դղյակում, որը, դժբախտաբար, 2009թ. ապրիլին հրդեհվեց և վերականգնումը տևեց շուրջ մեկ տարի: Հայաստանի բժշկական հանրությունը զորավիգ լինելով դղյակի վերականգնման աշխատանքներին, կազմակերպեց բարեգործական համերգ-դրամահավաք: Ի պատասխան ցուցաբերված օգնությանը, ծրագրի Ավստրիայի ղեկավարները հարկ համարեցին վերականգնված դղյակի 5-րդ հարկի սրահներից մեկն անվանել ՙՀայկական սրահ՚: Այս ցուցանակը կրող սրահը զարդարված է Հայաստանը ներկայացնող պատկերներով: Սա, անշուշտ, հաճելի, նաև` պատվարժան փաստ է:

Հարցեր, պատասխաններ, մեկնաբանություններ